Po sikur kryqëzatës së italianëve që kanë zgjedhur Shqipërinë për të kaluar pushimet e tyre verore t’i shtohej dhe kryeministrja Giorgia Meloni? Ky është “provokimi’ i radhës që kryeministri Edi Rama ka lëshuar në mediat italiane, pas publikimit të fotos me anijen e famshme Vlora, e cila tani lëviz në sensin e kundërt.
“Pra, do t’ju them një sekret – thotë kryeministri shqiptar Edi Rama për Il Foglio – folëm pak ditë më parë, ftova Giorgian dhe familjen e saj të kalonim disa ditë këtu, duke pushuar”.
Dhe çfarë i tha Meloni?
“Se ajo do të bënte gjithçka për të kaluar në Shqipëri për të më përshëndetur, pasi do të qëndrojë në Pulia. Duhet të biem dakord. Nuk mund të them më shumë,” është shprehur Rama.
Një ditë më parë, Rama publikoi një meme provokative në rrjetin e tij social, ku anija e famshme Vlora tashmë nuk shfaqej më e mbushur plot me shqiptarë, të cilët mësynë në Perëndim pasi fituan lirinë, por me italianë që vijnë për pushime në Shqipëri.
Por në një intervistë për mediat italiane, Rama ka sqaruar se e publikoi memen gabimisht.
“Kujtova se ajo ishte një foto e publikuar në ndonjë gazetë italiane,- thotë Rama për la Repubblica- por më pas djemtë e socialit më thanë që ishte meme. Megjithatë dyndja e italianëve për pushime në Shqipëri është një fakt i pamohueshëm.