Presidenti francez, Emmanuel Macron, është akuzuar për tradhti ndaj Francës pasi mori pjesë në një ceremoni hebre brenda rezidencës së tij zyrtare, Pallatit Elysée.
Në një vend ku ndarja e fesë është në vetvete një fe, ndezja e një qiri në Festivalin Hanukkah brenda pallatit të enjten u denoncua menjëherë nga politikanët e djathtë dhe të majtë.
Presidenti kishte ftuar kryerabinin e Francës, Haïm Korsia, për të ndezur të parin nga tetë qirinjtë, duke shënuar fillimin e festivalit hebre të dritave.
Por kur video e ceremonisë u shfaq pak më pas në rrjetet sociale, pati bujë, raportoi BBC.
Për opinionistët francezë, presidenti kishte bërë një turp të madh duke e lejuar fenë të hynte në hapësirat e shenjta të presidencës.
“Me sa di unë kjo është hera e parë që ndodh ndonjëherë. Është një shkelje e sekularizmit”, ka thënë David Lisnard, një figurë e shquar e opozitës së krahut të djathtë.
“Elysee nuk është një vend feje. Ju nuk mund të bëni kompromis me sekularizmin”, ka theksuar presidentja socialiste e rajonit Occitania, Carole Delga.
“A do të bëjë Macron tani të njëjtën gjë për fetë e tjera? Disa po, disa jo? Është një spirale e rrezikshme”, ka deklaruar Alexis Corbière nga e majta ekstreme “France Unbowed”.
Edhe disa hebrenj francezë u shprehën të çuditur. “Kjo është diçka që nuk duhet lejuar të ndodhë përsëri”, tha Yonathan Arfi, i cili drejton Këshillin Përfaqësues të Institucioneve Hebraike Franceze (Crif).