Disa serbë në veri të Kosovës kanë festuar mbrëmjen e së enjtes ditëlindjen e udhëheqësit të grupit terrorist për sulmin e Banjskës, Milan Radoiçiq.
Videoja nga festimet ka qarkulluar në grupet propagandistike serbe në Telegram. Një prej tyre, “Korridor”, ka publikuar video dhe fotografi nga festimet.
“Leposaviqi uron komandantin! S’ka dorëzim”, shkruhet në mesazhin e publikuar në Telegram nga ky grup. Ndërkaq në video shihen fishekzjarrë mbi fotografinë e Radoiçiqit të shoqëruar me shkrimin “Urime ditëlindjen komandant”.
Ndaj Radoiçiqit dhe 44 personave të tjerë, Prokuroria Speciale e Kosovës ngriti aktakuzë në shtator të 2024-s për sulmin terrorist në Banjskë të Zveçanit më 24 shtator 2023.