Komuna e Novobërdës, gjendet në lindje të Kosovës, por edhe atje jetojnë qytetarë serbë, ndonëse jo aq sa janë të fokusuar në veri të Kosovës.
Jetesën në këtë komunë, pothuajse e ndajnë përgjysmë komuniteti shqiptar dhe ai serb.
Në këtë frymë, edhe bashkëjetojnë edhe politikisht. Deri para vitit 2007, udhëhiqej nga serbët, ndërsa në zgjedhjet e vitit 2007, fitoi një shqiptar, Bajrush Ymeri.
Ai në Sytë 7 në Klan Kosova, tha se atë kohë edhe ai refuzohej nga komuniteti serb, bile edhe vet kryetari i deriatëhershëm refuzonte ta linte zyrën.
Ymeri, shtoi se pas rezistencës së parardhësit të tij në zyren e të parit të Novobërdës, ka ndërhyrë një gjeneral amerikan, i pozicionuar në Bondsteel. I njëjti, Ymeri citon t’i ketë thënë se “për ne, ti je kryetar i Novobërdës, edhe nëse punon në recepsion, por na jep kohë katër ditë, dhe lirohet zyra nga kryetari serb”.
Pikërisht, pas katër dite, Ymeri thotë se iu lirua zyra. Kujtojmë se edhe në këtë javë, janë amerikanët ata që po kërkojnë që kryetarët e komunave veriore duhet të punojnë nëpër objekte të tjera, jo domosdo në objektin komunal. Por, Bajrush Ymeri, që aktualisht është nënkryetar i Novobërdës, në Sytë 7, thotë se është tejet e vështirë të punohet jashtë objektit komunal.
Kjo, pasi sipas tij, puna e kryetarit është e lidhur ngushtë me stafin e administratës, stafin politikë, drejtorët, e çdo gjë tjetër që është brenda objektit të Komunës.