Gjykata e Posaçme aprovoi kërkesën e SPAK për sekuestron preventive ndaj dy pasurive që kanë pronare deputeten Monika Kryemadhi dhe nënën e saj Fatime Kryemadhi.
Për shkak të një hetimi pasuror të inicuar nga SPAK për mosjustifikim të të ardhurave, SPAK ka dyshime se gati 846 mijë euro janë të paargumentuara dhe për këtë ka dyshime se është përdorur skema e marrjes së kredisë bankare për të futur në sistem të ardhurat që dyshohen si pastrim parash.
Për këtë dyshim SPAK kërkoi sekuestrim të dy vilave që llogariten me shumën e pajustifikuar që sidoqoftë është ende nën hetim. Vendimi u firmos nga gjyqtari korrupsion Erjon Cela që është i njëjti i cili shpalli masat e sigurisë ndaj ish-presidentit Ilir Meta, bashkëshortes së tij dhe dy shtetasve të tjerë, nën hetim për çështje korrupsioni, pastrim parash dhe mos deklarim pasurie.
Bllokimi i pasurive që do të qëndrojnë nën sekuestro preventive deri në përfundim të hetimit gjyqësor është ekzekutuar nga policia gjyqësore. Pasuritë nën lupë sipas njoftimit të SPAK janë një ndërtesë në Selitë me sipërfaqe 152 metra katrorë në qendrën rezidenciale Kodra e Diellit, nën pronësi të nënës së deputetes.
Pothuajse e njëjta sipërfaqe pasurie, në të njëjtën qendër rezidenciale i është bllokuar si pronë edhe Kryemadhit. Zyrtarisht njoftohet se ngrirja e këtyre pasurive banesë dhe kate nëntokë është njoftuar edhe në regjistrat e agjencisë shtetërore të kadastrës ndërkohë që verdikti i gjykatës bëhet me dije se i është deklaruar edhe pronarëve.