Gjermania thotë se dy kabllo komunikacioni nën detin Baltik ka shumë gjasa të jenë dëmtuar me qëllim. Dy kabllo me fibra optike – njëri që lidh Finlandën me Gjermaninë dhe tjetri që lidh Suedinë me Lituaninë – pushiuan së funksionuari të dielën dhe të hënën, një kujtesë e incidenteve të mëparshme të sigurisë në rrugët ujore të prekura nga lufta mes Rusisë dhe Ukrainës.
Ministri gjerman i Mbrojtjes, Boris Pistorius tha të martën se askush nuk mund ta besojë që dëmtimi i dy kabllove është aksidental.
“Duhet të arrijmë në përfundimin, edhe pa e ditur saktësisht se kush e bëri një gjë të tillë, se është një goditje hibride. Po ashtu duhet të supozojmë, pa e ditur për momentin natyrisht, se bëhet fjalë për sabotim”.
Dëmtimi u zbulua të hënën në kabllon C-Lion1, rreth 1200 kilometra e gjatë që shtrihet nga kryeqyteti finlandez, Helsinki, deri në qytetin port të Gjermanisë, Rostock. Edhe një kabllo tjetër mes Lituanisë dhe Suedisë u dëmtua.
Duke folur me gazetarët në Bruksel, zoti Pistorius tha se situata e mbrojtjes në Evropë është e rrezikuar jo vetëm nga kërcënimi ushtarak por edhe nga ai hibrid që paraqet Rusia.
“Kjo do të thotë që duhet të jemi vigjilentë për mbrojtjen e përgjithshme, jo vetëm atë ushtarake. Dëmtimi i dy kabllove është një kujtesë e mëtejshme për një gjë të tillë. Një shenjë shumë e qartë se diçka po ndodh këtu”, tha ai.
Ministritë e Jashtme të Finlandës dhe Gjermanisë thanë të hënën në mbrëmje se dëmi ngrinte dyshime për sabotim. Në një deklaratë ato u shprehën se dy vendet po hetojnë incidentin dhe se është thelbësore që të mbrohet kjo “infrastrukturë kritike”.
Zoti Pistorius u pyet edhe për bisedën telefonike të së premtes mes kancelarit gjerman Olaf Scholz dhe presidentit rus Vladimir Putin.
“Kjo telefonatë vërtetoi se Putini nuk është i gatshëm të negociojë për asgjë. Të gjithë në Gjermani apo në vendet e tjera në Evropë duhet të kuptojnë se nuk është koha për të folur për paqen, sepse sigurisht që të gjithë duam paqe, por Putini nuk e do një gjë të tillë”.
Telefonata u kritikua ashpër nga presidenti ukrainas Volodymyr Zelenskyy, por zoti Pistorius tha se komunikimi është gjithmonë i rëndësishëm./voa