Serbët e kanë pranuar shumë rëndë dështimin në Kupën e Botës në Katar. Sidomos faktin që eliminimi erdhi nga Xherdan Shaqiri e Granit Xhaka, përkatësisht nga Zvicra.
Ka pasur deklarata nga kampi serb se në Katar do ta fitojnë titullin e botës. Por serbët nuk e kaluan grupin dhe madje përfunduan në vendin e fundit. Serbia ishte prej përfaqësueseve më të dobta në këtë Kupë të Botës. Dhe ka përfunduar në “kontejnerë”.
“Serbia në ‘kontejner’”, është titulli i sajtit të njohur beogradas “b92.net”.
“Reprezentacioni i Serbisë ka përjetuar shuplakë të re, ndërsa stadiumin ‘974’ ku luajti ndaj Zvicrës, e kemi quajtur ‘kontejner’ pasi prej të tillëve edhe është ndërtuar”, shkruan mediumi serb.
Mediumi beogradas ka vazhduar duke vlerësuar se ky është vendi ku aktualisht gjendet loja e Serbisë, sistemi, mentaliteti, kualiteti.