Kryeministri polak Donald Tusk ka shpallur planin e trajnimit ushtarak për të gjithë burrat. Në një fjalim në parlamentin polak, Tusk deklaroi se po punohet që të gjithë burrat në Poloni t’i nënshtrohen trajnimit ushtarak. Por detajet më të plota të këtij plani, sipas kreut të qeverisë polake do të jepen në muajt e ardhshëm.
“Po bëhen përpjekje për të përgatitur trajnime ushtarake në shkallë të gjerë për çdo mashkull të rritur në Poloni. Ne do të përpiqemi të kemi një model gati deri në fund të këtij viti, në mënyrë që çdo mashkull i rritur në Poloni të trajnohet në rast lufte, në mënyrë që kjo rezervë të jetë e krahasueshme dhe adekuate me kërcënimet e mundshme”, theksoi kryeministri polak, raporton A2 CNN.
Tusk tha se ushtria ukrainase ka 800,000 ushtarë, ndërsa Rusia ka rreth 1.3 milionë dhe ai dëshiron të rrisë numrin e ushtrisë polake, duke përfshirë rezervistët, në 500,000 nga rreth 200,000 tani.
“Ne po flasim për nevojën për të pasur një ushtri prej gjysmë milioni në Poloni, duke përfshirë edhe rezervistët”, tha ai.
“Nëse i organizojmë gjërat me mençuri dhe po flas vazhdimisht me Ministrin e Mbrojtjes, do të duhet të përdorim disa drejtime veprimi. Kjo do të thotë rezervistët, por edhe stërvitje intensive për t’i bërë ata që nuk shkojnë në ushtri ushtarë të plotë dhe kompetentë gjatë një konflikti,” shtoi ai.
Tusk tha se gratë gjithashtu mund t’i nënshtrohen trajnimit ushtarak, por “lufta është ende në një masë më të madhe domeni i burrave”.
Kryeministri tha se qeveria e tij po “shqyrtonte me kujdes” propozimin e Francës për të përfshirë Evropën nën ombrellën e saj bërthamore.
“Do të doja të dija para së gjithash në detaje se çfarë do të thotë kjo për sa i përket autoritetit mbi këto armë”, tha ai.
Tusk vuri në dukje se Ukraina u pushtua pasi hoqi qafe arsenalin e saj bërthamor, duke shtuar se Varshava do të donte të merrte armët e veta bërthamore, sado e largët të jetë kjo mundësi.
“Sot, është e qartë se ne do të ishim më të sigurt nëse do të kishim arsenalin tonë bërthamor, kjo është pa dyshim. Në çdo rast, rruga drejt kësaj do të ishte shumë e gjatë dhe gjithashtu do të duhej të kishte një konsensus,” tha ai.
Polonia tashmë po planifikon të shpenzojë 4.7% të prodhimit të saj ekonomik për mbrojtjen këtë vit, përqindja më e lartë në aleancën e NATO-s.