Ukrainasit u detyruan të braktisin sulmet e planifikuara me dron mbi objektivat ruse për shkak të ndërhyrjes së CEO të SpaceX, Elon Musk, i cili gjithashtu zotëron rrjetin satelitor të internetit Starlink.
Kievi planifikoi të kryente një sulm me një dron në një anije të Marinës së Federatës Ruse që ishte ankoruar në një port në gadishullin e Krimesë.
Megjithatë, Musk nuk lejoi hyrjen e forcave ukrainase në Starlink, sepse ai kishte theksuar më parë se ky rrjet nuk duhet të përdoret për sulme. Prandaj, Ukraina hoqi dorë nga sulmi në anijen e përmendur, raporton businessinsider.
Komandanti Suprem i Forcave të Armatosura të Ukrainës, Valery Zaluzhny, thuhet se dëshironte të vinte në kontakt me Shefin e Shtabit të Përbashkët të Ushtrisë Amerikane, gjeneralin Mark Milley, për t’u ankuar tek ai se miliarderi mund të diktonte atë që ushtria ukrainase mund ose nuk mund të bënte.
Zaluzhny shprehu shqetësimin për faktin se Musk parandaloi sulmet e planifikuara. Pronari i Teslas ende nuk ka komentuar mbi këto akuza.
Pasi Rusia pushtoi Ukrainën në fund të shkurtit të vitit 2022, Musk lejoi Kievin të përdorte Starlink për të shmangur varësinë nga infrastruktura e saj, të cilën Moska filloi ta shkatërronte.
Megjithatë, Musk theksoi qartë se Starlink duhet të përdoret vetëm për qëllime mbrojtëse dhe ai nuk e ndryshoi atë vendim.
Debati i fundit u ngrit pasi presidentja e SpaceX, Gwynne Shotwell, deklaroi në muajin shkurt se ajo do të kufizonte qasjen në Starlink në Kiev për qëllime ushtarake.