Me urdhër të Prokurorit të Dhomave të Specializuara është duke u kryer bastisje në shtëpinë e Ismail Sylës, ish-këshilltarit të ish-kryeministrit Hashim Thaçi.
Kujtojmë që dje është kryer bastisje në shtëpinë e Artan Behramit, poashtu ish-këshilltar i Thaçit.
Ndërsa para dy ditësh Specialja ka kryer bastisje në shtëpinë e ish-këshilltarëve Bashkim Smakaj dhe Blerim Shales.
E muaj më parë ishte bastisur edhe shtëpia e ish-këshilltarit tjetër, Adil Behramaj.
Pas bastisjes së shtëpisë dje , Artan Behrami, këshilltar i ish-presidentit Hashim Thaçi ka falënderuar familjarët dhe miqtë e tij nga trojet shqiptare për siç ka thënë “kujdesin dhe mesazhet inkurajuese“.
Ai ka shkruar në Facebook se bastisjet politike janë bërë “mjet i Prokurorisë së Gjykatës Speciale për të mbuluar disfatën në përballje me krerët e UÇK-së në sallën e gjyqit”
“Është momenti i fundit që të ndalet kjo marrëzi”, ka shkruar Behrami.