India ka regjistruar të mërkurën një temperaturë rekord prej 52.3 gradë Celsius, e cila thuhet të jetë më e larta e regjistruar ndonjëherë në Tokë.
Sipas Shërbimit Meteorologjik të Indisë, kjo temperaturë u regjistrua në një stacion meteorologjik në Mungespur, në periferi të Nju Delhit.
Qeveria po shqyrton të dhënat, duke thënë se temperatura është ekstreme në krahasim me leximet në stacione të tjera dhe mund të jetë një gabim sensori ose e ndikuar nga kushtet lokale. Parashikuesit e mëparshëm e kishin vlerësuar temperaturën në 9 gradë më pak dhe nuk e prisnin një përshkallëzim të tillë, ndërsa sipas ABC News, ishin erërat e ngrohta nga veriperëndimi i Indisë që kontribuuan në temperatura më të ngrohta se sa pritej.
Rekordi i mëparshëm në stacionin Mungespur u vendos në vitin 2002 kur termometri regjistroi 49.2 gradë Celsius, sipas transmetuesit indian NDTV, ndërsa në të gjithë vendin, temperatura e fundit e lartë u vendos në vitin 2016 në Rajasthan me 51 gradë Celsius.
Departamenti Meteorologjik i Indisë ka lëshuar një paralajmërim për valë të mëdha të nxehti në rajon. Vala e të nxehtit në Indi konsiderohet “e rëndë” kur temperaturat arrijnë 6.5 gradë Celsius mbi normalen.
Një alarm i kuq shëndetësor është lëshuar gjithashtu në Nju Delhi , duke treguar një probabilitet shumë të lartë të sëmundjes së nxehtësisë dhe goditjes së nxehtësisë tek të gjitha moshat në popullsinë e rajonit prej 30 milionë banorësh.