Presidentja e Kosovës Vjosa Osmani, kryetari i Kuvendit, Glauk Konjufca dhe kryeministri Albin Kurti kanë nënshkruar të mërkurën aplikimin për anëtarësim të Kosovës në Bashkimin Evropian.
Osmani, pas nënshkrimit ka thënë se kjo ditë është e veçantë për dy arsyeje.
“Në njërën anë po aplikojmë për anëtarësim në Bashkimin Evropian dhe në anën tjetër po shënojmë përvjetorin e themelimit të ushtrisë sonë, të dyja këto akte që shkojnë në drejtim të realizimit euroatlantik. Së bashku me kryeministrin e Kosovës dhe kryetarin e kuvendit po marrim një hap vendimtar drejt jetësimit sonë të ëndrrës kolektive e ambicies të patjetërsueshme”, tha ajo.
Sipas Osmanit, ky veprim Kosovën e afron afër Bashkimit Evropian.
Ndërsa e para e shtetit këtë hap e ka quajtur “historik”.
“Ne jemi sot së bashku për të sjell vendin tonë një hap më afër Bashkimit Evropian”, shtoi ajo.
“Për Kosovën dhe qytetarët e saj nuk ka pasur asnjëherë alternativë tjetër, por ëndrrat bëhen realitet vetëm kur veprohet e ambiciet bëhen të prekshëm vetëm kur veprohet”, deklaroi Osmani para mediave.
Ndërsa Kryetari i Kuvendit të Kosovës, Glauk Konjufca, ka theksuar se Kosova e meriton të jetë pjesë e Bashkimit Evropian.
“Për Kosovën dhe të gjithë rajonin anëtarësimi në këtë union është i rëndësisë së veçantë sepse Bashkimi Evropian ofron stabilitet, demokraci, siguri, prosperitet zhvillimore. Kur respektimi i të drejtave të njeriut, barazia, janë në thelbin e saj, një union i cili më të vërtetë e stimulon rritjen ekonomike të popujve dhe mirëqenien e tyre ndihmon në krijimin e më shumë vendeve të punës si dhe e mbështet rritjen ekonomike”, tha ai.
Ai e ka ftuar Parlamentin Evropian, Këshillin Evropian dhe Komisionin Evropian që ta demonstrojnë përkushtimin dhe përkrahjen e tyre ndaj Kosovës.
“Ky është hap i parë zyrtar drejt Bashkimit Evropian një rrugë e cila ishte mjaft e gjatë dhe aspak e lehtë. Ky rrugëtim, kalon përmes Komisionit Evropian nga i cili presim që të ja rekomandojë Bashkimit Evropian të ja jap Kosovës statusin e miratuar, por kuvendimi i takon megjithatë qeverive të vendeve anëtare të Bashkimit Evropian, të cilat gjithashtu i ftojmë të veprojnë unanimisht dhe për ta dhënë miratimin e tyre”.