Ishte data 18 nëntor e vitit 2023 dhe në Basel kishte festë, pasi Përfaqësuesja e Zvicrës dhe e Kosovës po zbrisnin në fushë ku stadiumi St Jacob Park ishte i stërmbushur me tifozë, kryesisht shqiptarë.
Përkundër shumë rasteve të Zvicrës, në fund ndeshja përfundoi baras 1-1, me Muhamet Hysenin që realizoi për t’i dhënë një pikë Dardanëve.
Si shumë shqiptarë që kishin marrë rrugën për në Basel, njësoj kishte vepruar edhe Driton Sedaj një 40-vjeçar që jeton në qytetin Biel së bashku me djemtë e tij Luanin 13 vjeç dhe Florianin 10 sosh.
Megjithatë 10-vjeçari Floriani një fans i madh i Granit Xhakës arriti ta bëj ëndrrën e tij realitet, që të ketë një foto me mesfushorin kosovar të Përfaqësueses së Zvcirës.
Floriani kaloi rojet e sigurisë dhe vrapoi në fushë pas përfundimit të ndeshjes duke bërë një foto me Xhakën, edhe pse qëllimi ishte ta kishte fanellën e mesfushorit.
Sigurimi i stadiumit e njoftoi Driton Sedajn se duhet t’i japë të dhënat personale, pasi djali i tij do të marrë një paralajmërim dhe ndoshta një dënim, por 40-vjeçari nuk mendoi se do të ishte diçka e madhe. Megjithatë të premtën e javës së kaluar, në adresën e familjes Sedaj ka shkuar një letër nga Federata Zvicerane e Futbollit (SFV) ku Floriani i vogël është dënuar me 2597,15 franga.
“Unë u trondita. Nuk ka pasur asnjë kërcënim, askush nuk është shqetësuar me hyrjen e tij. Një djalë 10-vjeçar nuk përbën rrezik për askënd”, tha Driton Sedaj për Blick.
Sedaj ka thënë se kurrë nuk e kishte paramenduar se dënimi do të ishte kaq i lartë.
“Federata Zvicerane e Futbollit ka para të mjaftueshme. Nuk mendoj se 2500 franga është e drejtë apo sportive. Sidomos pasi kishim paguar tashmë 60 franga për pranim. Po, Floriani është i shpejtë, por definitivisht jo më i shpejtë se stjuardët. Duhet të ishe më i kujdesshëm”, tha Driton Sedaj për Blick.