Ngjarja e ndodhur rreth orës 23:00 të mbrëmjes së të shtunës në Kamëz, ku një 27-vjeçare u raportua e vdekur pasi u rrëzua nga kati i katërt i banesës ku jetonte, nuk është aksidentale.
Në këtë përfundim kanë arritur hetuesit, të cilët kanë zbardhur ngjarjen dhe kanë arrestuar një 39-vjeçar, nën akuzën se me veprimet e tij ka shtyrë të renë drejt vetëvrasjes.
Sipas policisë 27-vjeçarja me inicialet S. A., e cila ndërroi jetë në spital, është vetëhedhur nga kati i katërt i banesës në rrugën “Teuta”, pasi shtetasi Arjan Çoku i ka publikuar një foto intime.
“Shërbimet e Komisariatit të Policisë Nr. 5, nisur nga dyshimet e krijuara mbi ngjarjen e ndodhur më datë 10.02.2024, në rrugën “Teuta”, ku u vetëhodh nga tarraca e katit të 4-t, një shtetase, e cila si pasojë e dëmtimeve të marra humbi jetën, kanë vijuar veprimet hetimore të thelluara, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për të bërë të mundur zbardhjen e rrethanave të ngjarjes.
Në vijim të veprimeve hetimore të kryera, specialistët për Hetimin e Krimeve në Komisariatin e Policisë Nr. 5 bënë ndalimin me iniciativë të shtetasit: A. Ç., 39 vjeç, për veprën penale “Shkaktimi i vetëvrasjes”.
Ky shtetas dyshohet se ka publikuar një foto intime të 27-vjeçares, e cila dyshohet se për këtë shkak është vetëhedhur nga tarraca e katit të 4-t dhe si pasojë e dëmtimeve të marra, ka humbur jetën.”