Franca do të fillojë t’i shesë Ukrainës avionë luftarakë Mirage 2000-5 deri në fund të vitit, tha Emmanuel Macron.
Presidenti francez e bëri njoftimin në përvjetorin e D-Day, fillimi i fushatës aleate për të rimarrë Evropën nga pushtimi nazist në 1944, raporton “The Telegraph”.
Pilotët ukrainas do të trajnohen në tokën franceze deri në gjashtë muaj, tha ai.
Macron nuk specifikoi se sa prej avionëve luftarakë, të cilët janë të pajisur me dy armë 30 mm dhe mund të udhëtojnë më shumë se dyfishi i shpejtësisë së zërit, do të dorëzohen.
“The Telegraph” raporton se Mirage 2000 u përdor për herë të parë nga forcat ajrore franceze në vitin 1984 e më pas edhe gjatë Luftës së Kosovës në vitin 1999 gjatë bombardimeve të NATO-s në Jugosllavi.
“Ne do të nisim një formë të re bashkëpunimi dhe do të njoftojmë transferimin e avionëve luftarakë Mirage 2000-5 nga Franca, që do t’i mundësojë Ukrainës të mbrojë tokën dhe hapësirën e saj ajrore”, tha Macron.
“Ne jemi në procesin e ndërtimit të një koalicioni me partnerë të tjerë, kështu që nuk do ta them sonte numrin përfundimtar [të avionëve të shitur]”.
Macron tha se do t’i propozonte Volodymyr Zelenskyt, presidentit ukrainas, që trajnimi i pilotëve të fillonte deri në fund të verës.
Në përkujtimet e Ditës D të enjten, Macron deklaroi se lufta “po kthehej në kontinentin tonë” dhe kritikoi “ata që duan të ndryshojnë kufijtë me forcë”.
Ai dukej se po godiste liderin rus Vladimir Putin, i cili filloi një pushtim të Ukrainës në shkurt 2022.
Zelensky u përshëndet ngrohtësisht nga presidenti francez kur mbërriti në plazhin Omaha, ku u duartrokit dhe u brohorit nga turma.