Fundi i një epoke të madhe për futbollin europian ka trokitur. Pak muaj më parë, Cristiano Ronaldo u largua nga Kontinenti i Vjetër drejt Arabisë Saudite dhe tashmë radha ishte e Lionel Messi-t. Argjentinasi vendosi t’i thotë “po” shumës së madhe të parave që i ofroi skuadra e David Beckham në SHBA, Inter Miami.
Ndikimin e tij në Amerikë e ka dhënë pa shkuar ende zyrtarisht.
Çmimi i biletës për ndeshjen që mendohet se do të debutojë është shumëfishuar. Më konkretisht, çmimi i biletës për ndeshjen e Inter Miami kundër Cruz Azul më 21 korrik është rritur… 16 herë. Të martën biletat shiteshin 29 dollarë, e ndërsa tashmë kanë arritur deri në 521 dollarë.
Ndeshja në të cilën Messi pritet të veshë për herë të parë fanellën e Inter Miami ka një biletë më të shtrenjtë se ndeshja e tretë e finales së NBA mes Miami Heat dhe Denver Nuggets! Dhe kjo po është një arritje.