Katër fëmijë nga një komunitet indigjen në Kolumbi janë gjetur të gjallë në jug të vendit më shumë se pesë javë pasi avioni me të cilin po udhëtonin u rrëzua në xhungël të dendur, tha të premten presidenti kolumbian Gustavo Petro.
Fëmijët u shpëtuan nga ushtria pranë kufirit midis provincave Caqueta dhe Guaviare të Kolumbisë, afër vendit ku u rrëzua avioni i vogël.
“Gëzim për të gjithë vendin! Katër fëmijë të zhdukur… të humbur… në xhunglën kolumbiane dolën të gjallë”, tha Petro përmes Twitter.
Avioni i vogël Cessna 206 mbante shtatë persona në rrugë midis Araracuara, shteti Amazonas dhe San Jose del Guaviare, një qytet në shtetin Guaviare, por raportoi një alarm për dështimin e motorit në orët e hershme të mëngjesit të 1 majit.
Tre të rritur, përfshirë pilotin, vdiqën si pasojë e përplasjes dhe trupat e tyre u gjetën në avion. Katër fëmijë të moshës 13, 9 dhe 4 vjeç, si dhe një foshnjë 11 muajshe i mbijetuan rënies.
Informacioni fillestar nga Autoriteti i Aviacionit Civil, i cili po koordinonte përpjekjet e shpëtimit, sugjeroi se fëmijët u arratisën nga avioni dhe u drejtuan në pyllin tropikal për të kërkuar ndihmë.
Ekipet e shpëtimit, me mbështetjen e qenve të kërkimit, gjetën më parë fruta të hedhura, të cilat dyshohet se i hëngrën fëmijët dhe strehimore të improvizuara të bëra nga bimësia e xhunglës.
Në operacionet e shpëtimit morën pjesë avionë dhe helikopterë të ushtrisë dhe forcave ajrore kolumbiane.